~我養的竉物是自己~

林夕，原名梁偉文，父親有三位妻子，林夕是他最後一位妻子的兒子。

林夕說，「我的童年，一滴快樂也沒有。」

父親性情暴躁，最喜歡拿母親出氣，吵吵罵罵，林夕忍了十幾年，直到在港大讀翻譯系，才首次反抗。

「我老豆即刻發脾氣，將d碗打爛晒，粗口橫飛。之後，半夜扎醒會鬧我，我去廁所沖涼沖耐少少又俾佢鬧，鬧足一個月，順手鬧埋阿媽。」

「呢種環境長大，令我好相信，所有荒謬的事，都有可能發生。」

結果，林夕在提心吊膽中，完成了學位。修讀碩士課程時，才搬進大學宿舍。

「黃霑對我講過，每條路，都係天要人行就行。如果我擁有一個快樂童年，當然好；但係快樂過，到失去時，就會懷念，唔識點樣更加快樂。」

對父親，一直心存恨意。直到九一年，父親過身。

「那個年代，未有手提，得call機；那夜，我去打牌，漏了部call機喺屋企，回到家，見到一張字條，字條寫著：『你老豆已經死了。』當時的感覺好奇妙，好似立即釋放晒。

「有這種反應，都不是沒有內疚的。」

去到殯儀館，才記得父親生前最愛夢特嬌；才記得最後一面，是去打牌前閂房門的一剎，瞥見父親問了母親一句：「佢頭先講咩話？」

「幾年前看《BigFish》（《大魚奇緣》，一齣講父子感情的電影），還很大感慨。他不是不愛我們，只是完全唔識愛，累阿媽受了十幾二十年苦。

好可惜，呢個世界，太多人唔識愛人。